मुंबई:

सलीम दुराणी हे फक्त एक उत्तम क्रिकेटपटू नव्हते. ते एक मनमिळाऊ, हजरजबाबी आणि क्रिकेट चाहत्यांशी जवळचे नाते जपणारे माणूस होते. राष्ट्रवादी काँग्रेसचे सर्वेसर्वा आणि महाराष्ट्राचे माजी मुख्यमंत्री शरद पवार यांनी दुराणी यांच्या आठवणींना उजाळा दिला. निमित्त होते, 'अंजुमन-ए-इस्लाम' आणि 'मुंबई क्रिकेट असोसिएशन' (MCA) यांच्या संयुक्त विद्यमाने सुरू करण्यात आलेल्या 'सलीम दुराणी इंटरकॉलेजिएट रोटेटिंग क्रिकेट ट्रॉफी'च्या उद्घाटनाचे. हा शानदार सोहळा अंजुमन-ए-इस्लामच्या ऐतिहासिक सीएसएमटी (CSMT) कॅम्पसमध्ये पार पडला.

या भव्य कार्यक्रमाला अनेक दिग्गज उपस्थित होते. अंजुमन-ए-इस्लामचे अध्यक्ष डॉ. झहीर काझी, भारताचे माजी कर्णधार दिलीप वेंगसरकर, एमसीएचे अध्यक्ष अजिंक्य नाईक, आमदार डॉ. जितेंद्र आव्हाड आणि अबू आसिम आझमी यांनी या सोहळ्याची शोभा वाढवली. या नवीन ट्रॉफीअंतर्गत मुंबईतील ज्युनियर कॉलेजांमध्ये टी-२० (T20) क्रिकेट सामने खेळवले जाणार आहेत. महाविद्यालयांमध्ये खेळांना प्रोत्साहन देणे आणि तरुण खेळाडूंना आपले कौशल्य दाखवण्यासाठी एक हक्काचे व्यासपीठ उपलब्ध करून देणे, हा यामागचा मुख्य उद्देश आहे.

शरद पवार यांनी आपल्या भाषणात सलीम दुराणी यांना भावपूर्ण श्रद्धांजली वाहिली. दुराणी यांचा जन्म अफगाणिस्तानात झाला होता. तेथून ते मुंबईत आले आणि खऱ्या अर्थाने 'मुंबईकर' बनले. क्रिकेटच्या मैदानावर त्यांचा एक वेगळाच रुबाब असायचा. प्रेक्षक त्यांच्या फलंदाजीची आतुरतेने वाट पाहायचे. प्रेक्षकांमधून चौकार आणि षटकारांची मागणी व्हायची आणि दुराणी पुढच्याच चेंडूवर ती पूर्ण करण्याचा प्रयत्न करायचे. चाहत्यांशी त्यांचे हे नाते कायमच खास राहिले. भारत सरकारने त्यांना क्रीडा क्षेत्रातील सर्वोच्च 'अर्जुन पुरस्कार' आणि 'सी. के. नायडू पुरस्कार' देऊन सन्मानित केले होते, अशी आठवण पवार यांनी सांगितली.

मुंबई हे क्रिकेटचे एक प्रमुख केंद्र आहे. भारतीय क्रिकेटपटूंची यादी मुंबईच्या उल्लेखाशिवाय पूर्ण होऊच शकत नाही. या शहराने देशाला हजारो दिग्गज क्रिकेटपटू दिले आहेत. शिक्षण आणि क्रीडा क्षेत्रातील अंजुमन-ए-इस्लामच्या योगदानाचेही पवार यांनी विशेष कौतुक केले. आपले जुने मित्र बॅरिस्टर अंतुले यांच्यासोबत आपण पहिल्यांदा अंजुमनच्या वास्तूत आल्याचे त्यांनी सांगितले. अंजुमनची लायब्ररी आणि इथला भव्य हॉल खरोखरच अप्रतिम आहे. वास्तुकलेच्या दृष्टीने मुंबईत केवळ तीनच हॉल अद्वितीय मानले जातात. एक अंजुमनचा हॉल, दुसरा मुंबई महानगरपालिकेचा आणि तिसरा मुंबई विद्यापीठाचा हॉल. या सुंदर वास्तूत हा कार्यक्रम होत असल्याबद्दल त्यांनी समाधान व्यक्त केले.

यावेळी माजी कर्णधार दिलीप वेंगसरकर यांनी जुन्या आठवणींना उजाळा दिला. सेंट झेविअर्स कॉलेजकडून खेळताना अंजुमन-ए-इस्लामच्या संघाशी सामना करणे आमच्यासाठी नेहमीच एक आव्हान असायचे, असे वेंगसरकर म्हणाले. त्यांच्याकडे उत्तम फलंदाज आणि भेदक गोलंदाज होते. अंजुमन-ए-इस्लामचे अध्यक्ष पद्मश्री डॉ. झहीर काझी यांनी संस्थेच्या गौरवशाली इतिहासावर प्रकाश टाकला. हॅरिस शील्ड (Harris Shield) स्पर्धेतील अंजुमन-ए-इस्लामचे वर्चस्व आमच्यासाठी अभिमानाची गोष्ट आहे. या स्पर्धेच्या १३० वर्षांच्या इतिहासात अंजुमनच्या शाळांनी सर्वाधिक वेळा विजेतेपद पटकावले आहे, असे डॉ. काझी यांनी अभिमानाने सांगितले.