नवी दिल्ली/कोलंबो

बंगालच्या उपसागरात निर्माण झालेल्या 'दितवाह' (Ditwah) चक्रीवादळाने रौद्र रूप धारण केले असून, दक्षिण भारतात हाय अलर्ट जारी करण्यात आला आहे. या चक्रीवादळाने श्रीलंकेत हाहाकार माजवला असून तिथे किमान १५९ लोकांचा बळी गेला आहे. तर भारतात, तामिळनाडूमध्ये पावसाशी संबंधित दुर्घटनांमध्ये तिघांचा मृत्यू झाल्याची माहिती राज्याचे महसूल आणि आपत्ती व्यवस्थापन मंत्री के.के.एस.एस.आर. रामचंद्रन यांनी दिली आहे.

भारतीय हवामान विभागाने (IMD) रविवारी तामिळनाडू आणि पुद्दुचेरीमधील अनेक जिल्ह्यांसाठी, विशेषतः चेन्नईसाठी 'यलो अलर्ट' जारी केला आहे. हलका ते मध्यम पाऊस आणि विजांच्या कडकडाटासह वादळी वारे वाहण्याची शक्यता वर्तवण्यात आली आहे.

हवामान विभागाने दिलेल्या माहितीनुसार, हे चक्रीवादळ पुढील २४ तासांत उत्तर तामिळनाडू आणि पुद्दुचेरीच्या किनारपट्टीला समांतर, उत्तरेच्या दिशेने सरकणार आहे. ३० नोव्हेंबर रोजी दुपारपर्यंत हे वादळ किनारपट्टीपासून ७० किमी आणि संध्याकाळपर्यंत ३० किमी अंतरावर असण्याचा अंदाज आहे.

आणीबाणीच्या सेवेसाठी पथके तैनात

चक्रीवादळाची तीव्रता वाढत असल्याने खबरदारीचा उपाय म्हणून 'एनडीआरएफ'च्या (NDRF) ६ व्या बटालियनच्या पाच तुकड्यांना रविवारी वडोदरा येथून एअरलिफ्ट करून चेन्नईला आणण्यात आले आहे. या तुकड्या पूरस्थितीत बचाव कार्य करण्यासाठी आणि कोसळलेल्या इमारतींमधून सुटका करण्यासाठीअत्याधुनिक उपकरणांनी सज्ज आहेत.

श्रीलंकेत विनाशाचे तांडव

'दितवाह' चक्रीवादळाचा श्रीलंकेला जबरदस्त फटका बसला आहे. आपत्ती व्यवस्थापन केंद्राच्या (DMC) माहितीनुसार, मृतांचा आकडा १५९ वर पोहोचला आहे. परिस्थितीचे गांभीर्य ओळखून राष्ट्रपती अनुरा कुमारा दिसानायके यांनी आणीबाणी घोषित केली असून आंतरराष्ट्रीय मदतीचे आवाहन केले आहे.

जरी चक्रीवादळ पुढे सरकले असले, तरी केलानी नदीला आलेल्या पुरामुळे उत्तर कोलंबोमध्ये गंभीर परिस्थिती निर्माण झाली आहे. या नैसर्गिक आपत्तीमुळे २०,००० हून अधिक घरांचे नुकसान झाले आहे आणि १.२२ लाख लोकांना सरकारी निवारा केंद्रांमध्ये हलवण्यात आले आहे. तब्बल ८.३३ लाख लोक विस्थापित झाले असून त्यांना मदतीची गरज आहे. वीजवाहिनी कोसळल्याने आणि जलशुद्धीकरण प्रकल्प बुडाल्याने देशाच्या एक तृतीयांश भागात वीज आणि पाणीपुरवठा ठप्प झाला आहे.

'ऑपरेशन सागर बंधू': भारत मदतीला

संकटाच्या काळात भारताने पुन्हा एकदा शेजारी धर्माचे पालन करत 'ऑपरेशन सागर बंधू' सुरू केले आहे. भारत या संकटात 'फर्स्ट रिस्पॉन्डर' (प्रथम मदतनीस) ठरला आहे. भारतीय हवाई दल, नौदल आणि ८० एनडीआरएफ जवानांच्या मदतीने श्रीलंकेला आधार दिला जात आहे.

आतापर्यंत भारताने २७ टन मदत सामग्री कोलंबोमध्ये पोहोचवली आहे. भारतीय हवाई दलाची Mi-17 V5 हेलिकॉप्टर्स कोलंबोमध्ये तैनात करण्यात आली आहेत. याशिवाय, शुक्रवारी रात्री हिंडन एअर बेसवरून C-130 ट्रान्सपोर्ट एअरक्राफ्ट आणि इल्युशिन IL-76 विमानाने २१ टन मदत साहित्य, ८० पेक्षा जास्त एनडीआरएफ जवान आणि ८ टन उपकरणे कोलंबोमध्ये उतरवली. 'आयएनएस विक्रांत' युद्धनौकेवरील चेतक हेलिकॉप्टर्सद्वारे शोध आणि बचाव मोहीम राबवली जात आहे.