वॉशिंग्टन
इराणमधील युद्ध आणि त्यामुळे वाढलेल्या तेलाच्या दरांमुळेच अमेरिकन मध्यावधी निवडणुकांमध्ये (US Midterm Elections) रिपब्लिकन पक्षाचा दारुण पराभव झाला, ही बाब अमेरिकेचे राष्ट्राध्यक्ष डोनाल्ड ट्रम्प यांनी बुधवारी मान्य केली आहे. इराण युद्धामुळेच पक्षाचे मोठे नुकसान झाल्याचे विधान उपाध्यक्ष जे. डी. व्हान्स यांनी केले होते, यावर पत्रकारांनी विचारलेल्या प्रश्नाला उत्तर देताना ट्रम्प यांनी हे विधान 'बऱ्याच अंशी सत्य' असल्याचे स्पष्ट केले.
पत्रकारांशी बोलताना डोनाल्ड ट्रम्प म्हणाले, "शॉर्ट टर्ममध्ये (अल्प कालावधीत) गॅसोलीन आणि इंधनाचे दर वाढल्याने पक्षाचे नुकसान झाले हे खरे आहे. मात्र, जर मला ही कारवाई पुन्हा करण्याची वेळ आली, तर मी ती नक्कीच करेन. कारण दीर्घकालीन हिताच्या दृष्टीने हाच एकमेव पर्याय होता. आपण इराणला कोणत्याही परिस्थितीत अण्वस्त्रे मिळवू देऊ शकत नाही." तसेच, या युद्धात अमेरिकन सैन्याने घेतलेल्या भूमिकेवर मला कोणताही पश्चात्ताप नसून, आपण इराणचे लष्कर, नौदल आणि हवाई दल पूर्णपणे उद्ध्वस्त केल्याचा दावाही त्यांनी केला.
इराण युद्धावरून अमेरिकन नागरिकांमध्ये मोठा असंतोष निर्माण झाला असला आणि उपाध्यक्ष जे. डी. व्हान्स यांनी युद्धावर उघड टीका केली असली, तरी संरक्षण मंत्री पीट हेगसेथ (Pete Hegseth) यांना हटवण्याचा आपला कोणताही विचार नसल्याचे ट्रम्प यांनी स्पष्ट केले. हेगसेथ अत्यंत उत्तम काम करत असल्याचे त्यांनी सांगितले. होर्मुझच्या सामुद्रधुनीतून तेलाची वाहतूक आता सुरळीत सुरू असल्याचे सांगत, युद्ध नव्हे तर इंधनाचे वाढलेले दर हेच रिपब्लिकन पक्षाच्या पराभवाचे मुख्य कारण ठरल्याचा पुनरुच्चार त्यांनी केला.
