दुबई
पश्चिम आशियातील युद्धाच्या पार्श्वभूमीवर इराणने भारतासह चार देशांच्या व्यापारी जहाजांना होर्मुझच्या सामुद्रधुनीतील (Strait of Hormuz) वाहतूक निर्बंधातून पूर्णपणे सूट दिली आहे. इराणच्या संसदेच्या राष्ट्रीय सुरक्षा आणि परराष्ट्र धोरण समितीचे उपाध्यक्ष अमीर हयात मुकद्दम यांनी या निर्णयाची घोषणा केली असून, या महत्त्वपूर्ण निर्णयामुळे भारतीय जहाजांना या मोक्याच्या सागरी मार्गावरून विनाअडथळा प्रवास करता येणार आहे.
इराणी विद्यार्थ्यांच्या वृत्तसंस्थेला (ISNA) दिलेल्या मुलाखतीत अमीर हयात मुकद्दम यांनी सांगितले की, इराणने सध्या भारत, चीन, इराख आणि कतार या चार देशांना होर्मुझच्या सामुद्रधुनीतील प्रवासावरील निर्बंधातून वगळले आहे. या देशांची जहाजे या मार्गावरून विनाअडथळा जाऊ शकतात आणि अमेरिकन सैन्यही त्यांना रोखत नाही. भारताला ही सूट देण्यामागे औषधांची आयात सुलभ करणे हा मुख्य उद्देश आहे, तर चीनसोबतच्या राजकीय आणि आर्थिक सहकार्याचा विचार करून चीनला ही सवलत देण्यात आली आहे.
होर्मुझची सामुद्रधुनी ही फारसची आखात आणि ओमानचे आखात यांना जोडणारा अत्यंत महत्त्वाचा सागरी मार्ग आहे, जिथून जगातील सुमारे २० टक्के ऊर्जा पुरवठा होतो. अमेरिका आणि इस्रायलसोबत सुरू असलेल्या संघर्षानंतर इराणने या मार्गावर कडक निर्बंध लादले आहेत. या पार्श्वभूमीवर भारताने सातत्याने चर्चेच्या आणि मुत्सद्देगिरीच्या माध्यमातून तोडगा काढण्याचे आवाहन केले असून, व्यापारी जहाजांवरील हल्ले थांबवून आंतरराष्ट्रीय कायद्यानुसार मोकळा सागरी व्यापार पूर्ववत करण्याची मागणी केली आहे.
