दुबई 

होर्मुझ सामुद्रधुनी (Strait of Hormuz) परिसरामध्ये कुवेतच्या एका जहाजावर क्षेपणास्त्र हल्ला झाल्याची घटना समोर आली आहे. या हल्ल्यानंतर ओमानमधील भारतीय दूतावासाने तातडीने पावले उचलत जहाजावरील ५ भारतीय नागरिकांची सुखरूप सुटका केली आहे.

'एमटी काझिमा ३' (MT Kazimah III) असे या कुवेतच्या ध्वज असलेल्या जहाजाचे नाव आहे. या जहाजावर अज्ञात क्षेपणास्त्र किंवा प्रोजेक्टाइलने हल्ला केला होता. घटनेची माहिती मिळताच ओमानमधील भारतीय दूतावासाने स्थानिक प्रशासनाशी समन्वय साधून बचावकार्य राबवले. सर्व ५ भारतीय खलाशांना सुखरूपपणे सुरक्षित ठिकाणी (किनारी भागात) हलवण्यात आले आहे. ओमानच्या प्रशासनाने केलेल्या सहकार्याबद्दल भारतीय दूतावासाने त्यांचे आभार मानले आहेत.

पश्चिम आशियातील वाढत्या तणावाच्या पार्श्वभूमीवर व्यावसायिक जहाजांवर होणाऱ्या हल्ल्यांची संख्या वाढली आहे. या जहाजांवर अनेक भारतीय खलाशी आणि नागरिक काम करत असून, त्यांच्या सुरक्षेसाठी भारताचे राजनैतिक प्रयत्न सातत्याने सुरू आहेत. होर्मुझ सामुद्रधुनी हा पर्शियन आखाताला ओमान आखात आणि अरबी समुद्राशी जोडणारा अत्यंत महत्त्वाचा आणि संवेदनक्षम सागरी मार्ग आहे.