जेरुसलेम गाझामधील युद्ध तीव्र करण्याचा आणि हमासच्या उरलेल्या मजबूत तळांना लक्ष्य करण्याचा आमचा नवीन लष्करी निर्णय हा "युद्ध संपवण्याचा सर्वोत्तम मार्ग" आहे, असे इस्रायलचे पंतप्रधान बेंजामिन नेतन्याहू यांनी म्हटले आहे. रविवारी जेरुसलेम येथे एका पत्रकार परिषदेत बोलताना, नेतन्याहू यांनी आपल्या योजनेचा बचाव केला. ते म्हणाले, "ही नवीन कारवाई मर्यादित काळासाठी असेल, कारण आमचे अंतिम ध्येय युद्ध संपवणे आहे."
सुमारे २२ महिन्यांपासून सुरू असलेल्या या युद्धामुळे इस्रायली समाजात फूट पडली आहे. एका गटाला युद्ध संपवून ओलिसांची सुटका हवी आहे, तर दुसऱ्या गटाला पॅलेस्टिनी लढवय्यांचा कायमचा खात्मा हवा आहे. शुक्रवारी इस्रायली सुरक्षा मंत्रिमंडळाने युद्धाचा विस्तार करून गाझा शहरावर ताबा मिळवण्याच्या योजनेला मंजुरी दिल्यानंतर, सरकारच्या विरोधातील टीका आणखी तीव्र झाली आहे.
तरीही, नेतन्याहू यांनी आपल्या निर्णयाचे समर्थन करत म्हटले, "युद्ध संपवण्याचा हाच सर्वात जलद आणि प्रभावी मार्ग आहे. गाझा शहर आणि मध्यवर्ती शिबिरांमधील हमासच्या दोन मजबूत गडांना उद्ध्वस्त करणे, तसेच नागरिकांना बाहेर पडण्यासाठी सुरक्षित मार्ग तयार करणे हे आमचे ध्येय आहे." त्यांनी दावा केला की, गाझाचा सुमारे ७०-७५% भाग आता इस्रायली लष्कराच्या नियंत्रणाखाली आहे, परंतु गाझा शहर आणि अल-मवासी भागातील तळ अजूनही हमासच्या ताब्यात आहेत.
दुसरीकडे, हमासने नेतन्याहूंच्या पत्रकार परिषदेला "खोटारडेपणाचा सिलसिला" म्हटले आहे. हमासच्या राजकीय ब्युरोचे माध्यम सल्लागार ताहेर अल-नुनो म्हणाले, "नेतन्याहू सतत खोटे बोलत आहेत, फसवणूक करत आहेत आणि जनतेची दिशाभूल करत आहेत. त्यांचे प्रत्येक विधान सत्यापासून दूर आहे."
ही पत्रकार परिषद अशा वेळी झाली, जेव्हा एक दिवसापूर्वीच हजारो लोकांनी तेल अवीवच्या रस्त्यावर उतरून सुरक्षा मंत्रिमंडळाच्या निर्णयाविरोधात निदर्शने केली होती आणि गाझाच्या परिस्थितीवर संयुक्त राष्ट्र सुरक्षा परिषदेत बैठक होणार होती.
