संयुक्त राष्ट्र सुरक्षा परिषदेत होणार भारत-पाकिस्तानवर चर्चा

Story by आवाज़ मराठी | Published by Bhakti Chalak • 20 h ago

प्रातिनिधिक फोटो

पहलगाम दहशतवादी हल्ल्यात २६ जण मारले गेल्याने निर्माण झालेल्या तणावाच्या पार्श्वभूमीवर संयुक्त राष्ट्र सुरक्षा परिषद आज भारत आणि पाकिस्तानमधील परिस्थितीवर चर्चा करणार आहे. भारताच्या कठोर कारवाईने हादरलेल्या पाकिस्तानने या मुद्द्यावर तातडीची बैठक बोलावण्याची मागणी केली, असे पीटीआय वृत्तसंस्थेने म्हटले. या १५ सदस्य असलेल्या सुरक्षा परिषदेचा पाकिस्तान हा तात्पुरता सदस्य आहे.

पाकिस्तानने दोन शेजारी देशांमधील तणावावर बंदद्वार चर्चा करण्याची मागणी केली. ग्रीसच्या अध्यक्षांनी आज दुपारी ही चर्चा करण्याचे निश्चित केले. सुरक्षा परिषदेत पाच देशांना नकाराधिकार आहे. त्यामध्ये चीन, फ्रान्स, रशिया, ब्रिटन आणि अमेरिका या देशांचा समावेश आहे. अल्जेरिया, डेन्मार्क, ग्रीस, गयाना, पाकिस्तान, पनामा, दक्षिण कोरिया, सिएरा लिओन, स्लोव्हेनिया आणि सोमालिया हे दहा तात्पुरते सदस्य देश आहेत.

पहलगाम हल्ल्यानंतर भारताने पाकिस्तानविरुद्ध अनेक कठोर पावले उचलली. यात सिंधू जल करार स्थगित करणे, पाकिस्तानी नागरिकांचे व्हिसा रद्द करणे आणि पाकिस्तानातून आयात पूर्णपणे बंद करणे यांचा समावेश आहे.

गेल्या आठवड्यात ग्रीसचे संयुक्त राष्ट्रातील राजदूत आणि मे महिन्यासाठी परिषदेचे अध्यक्ष इव्हँजेलोस सेकेरिस यांनी सांगितले, “भारत-पाकिस्तान परिस्थितीवर चर्चेसाठी बैठकेची मागणी झाली तर ती व्हायला हवी. यातून मते मांडली जातील. तणाव कमी होण्यास मदत होईल. आम्ही सातत्याने संपर्कात आहोत. ही बैठक लवकरच होऊ शकते. आम्ही तयारी करत आहोत."

पाकिस्तानकडून भारतावर होणारा सीमापार दहशतवाद हा महत्त्वाचा मुद्दा आहे, असे ग्रीक राजदूताने नमूद केले. “आम्ही कोणत्याही दहशतवादी कृत्याचा तीव्र निषेध करतो. काश्मीरमधील या भयंकर हल्ल्यावर आम्ही हीच भूमिका घेतली,” असे ते म्हणाले.

परिषद दहशतवादाचा सर्व प्रकारे निषेध करते. मात्र क्षेत्रातील वाढता तणाव चिंताजनक आहे, असे सेकेरिस म्हणाले. “दोन्ही मोठे देश आहेत. भारत निश्चितच खूप मोठा आहे,” असे त्यांनी सांगितले.

जयशंकर यांचा परिषदेतील सदस्यांशी संवाद

पहलगाम हल्ल्यानंतरच्या आठवड्यांत परराष्ट्रमंत्री एस. जयशंकर यांनी परिषदेतील सर्व सदस्यांशी संपर्क साधला. यात चीन आणि पाकिस्तान हे देश अपवाद आहे. हल्ल्याचे कटकारस्थान करणारे, पाठबळ देणारे आणि नियोजन करणारे यांना न्यायाच्या कठड्यापर्यंत आणण्याची गरज जयशंकर यांनी या चर्चेत अधोरेखित केली.

जयशंकर यांनी ग्रीसचे परराष्ट्रमंत्री जॉर्ज गेरापेट्रिटिस यांच्याशी चांगली चर्चा केली. पहलगाम हल्ल्यावर बोलताना त्यांनी ग्रीसच्या सीमापार दहशतवादाविरुद्धच्या ठाम भूमिकेचे स्वागत केले. “आमची रणनीतिक भागीदारी आमच्या संबंधांची तीव्रता दर्शवते,” असे जयशंकर म्हणाले. जयशंकर यांनी संयुक्त राष्ट्रांचे सरचिटणीस अँटोनियो गुटेरेस, रशियाचे परराष्ट्रमंत्री सर्जेई लाव्हरोव, अमेरिकेचे परराष्ट्रमंत्री मार्को रुबियो, ब्रिटनचे परराष्ट्रमंत्री डेव्हिड लॅमी आणि फ्रान्सचे परराष्ट्रमंत्री ज्याँ-नोएल बॅरो यांच्याशीही संवाद साधला.

संयुक्त राष्ट्रांचे भारत-पाकिस्तानला आवाहन

२२ एप्रिलच्या पहलगाम हल्ल्यानंतर संयुक्त राष्ट्रांनी भारत आणि पाकिस्तानला कमाल संयम राखण्याचे आवाहन केले. पुढील तणाव टाळावा, असेही सांगितले. संयुक्त राष्ट्रांचे प्रवक्ते स्टेफन डुजारीक यांनी हल्ल्याचा निषेध केला. दोन्ही शेजारी देशांनी शांततेने आणि परस्पर संवादातून मुद्दे सोडवावेत, असे ते म्हणाले.