नवी दिल्ली

बॉलिवूड दिग्दर्शक फरहान अख्तरच्या दिग्दर्शनाखाली तयार झालेला आणि तरुणाईच्या मनात वेगळे स्थान निर्माण करणारा 'दिल चाहता है' (Dil Chahta Hai) हा चित्रपट प्रदर्शित होऊन आता २५ वर्षे पूर्ण झाली आहेत. १० ऑगस्ट २००१ रोजी प्रदर्शित झालेल्या या सिनेमाने हिंदी चित्रपटसृष्टीतील मैत्री आणि प्रेमाची पारंपरिक व्याख्या पूर्णपणे बदलून टाकता आली. रोमान्सपलीकडे जाऊन दोन मित्रांमधील घट्ट नाते आणि शहरी संस्कृतीचे सुंदर चित्रण या चित्रपटात पाहायला मिळाले.

फरहान अख्तरने वयाच्या अवघ्या २७ व्या वर्षी या चित्रपटाद्वारे दिग्दर्शन क्षेत्रात पदार्पण केले होते. एक्सेल एंटरटेनमेंटच्या बॅनरखाली तयार झालेल्या या चित्रपटात आमिर खान, सैफ अली खान, अक्षय खन्ना, प्रिती जिंटा, डिंपल कपाडिया आणि सोनाली कुलकर्णी यांच्या प्रमुख भूमिका होत्या. आकाश, समीर आणि सिद्धार्थ या तीन वेगवेगळ्या स्वभावाच्या मित्रांची ही कथा आणि त्यांची गोवा ट्रिप आजही प्रेक्षकांच्या चांगल्याच लक्षात आहे.

चित्रपटसृष्टीतील ऐतिहासिक टप्पा

शंकर-एहसान-लोय यांचे संगीत, जावेद अख्तर यांचे बहारदार गीत आणि रवी के. चंद्रन यांचे छायाचित्रण यामुळे या चित्रपटाने बॉलिवूडला एक नवीन रूप दिले. एकोणिसशे नव्वदच्या दशकातील मेलोड्रामा आणि मोठ्या फॉर्म्युला चित्रपटांपेक्षा हा सिनेमा अतिशय वास्तववादी, आधुनिक आणि तरुणांशी जोडणारा ठरला. आजही या चित्रपटातील गाणी आणि संवाद प्रेक्षकांच्या ओठावर कायम आहेत.