पुणे पोलीस आयुक्त अमितेश कुमार यांच्या हस्ते सन्मान स्वीकारताना फिरोज जानमहंमद शेख
अल्फिया शेख
परदेशातला लाखांचा पगार, आलिशान आयुष्य आणि सुरक्षित भवितव्य सोडून कोणी आपल्या देशातल्या पोरांसाठी परत येईल का? आजच्या काळात असा विचारही कोणी करणार नाही. पण याच वाटेवर एक पाऊल पुढे टाकत एका अवलियाने स्वतःचे आयुष्य बदललेच, शिवाय हजारो तरुणांच्या आयुष्याला नवी दिशा दिली.
दुबई आणि सौदी अरेबियासारख्या देशांमध्ये तब्बल २४ वर्षे फॅक्टरी मॅनेजरसारख्या उच्च पदांवर काम केल्यानंतर मायदेशी परतून तरुणांचे भविष्य घडवणारे फिरोज जानमहंमद शेख यांचा हा प्रेरक प्रवास. नुकतेच पुणे पोलीस आयुक्त अमितेश कुमार यांच्या हस्ते त्यांच्या या अथांग सामाजिक कार्याचा विशेष गौरव करण्यात आला.
शेतातून सुरू झालेला जिद्दीचा प्रवास
फिरोज शेख यांची पार्श्वभूमी तशी अत्यंत सर्वसामान्य. सातारा जिल्ह्यातील फलटण तालुक्यातील सोनवडी बुद्रुक हे त्यांचे मूळ गाव. शेतकरी कुटुंबात जन्मलेल्या फिरोज यांनी प्रतिकूल परिस्थितीशी दोन हात करत शिक्षण पूर्ण केले. गेली बावीस वर्षे ते पुण्यात कात्रज भागात स्थायिक आहेत.
सरकारी महाविद्यालयातून मेकॅनिकल इंजिनिअरिंगची पदवी घेतल्यानंतर त्यांनी पुढे अजून शिकण्याचे ठरवले. शिक्षणाची भूक मोठी असल्याने त्यांनी पुढे एमबीए आणि आयएसओ ऑडिटर यांसारख्या उच्च पदव्या मिळवून स्वतःला अधिक सक्षम केले.
मायदेशी परतण्याचा धाडसी निर्णय
भारतात व्यावसायिक कारकिर्दीची यशस्वी सुरुवात केल्यानंतर फिरोज यांना परदेशात संधी मिळाली. दुबई आणि सौदी अरेबियामध्ये त्यांनी विविध नामांकित कंपन्यांमध्ये जबाबदारीची पदे भूषवली. मोठ्या अनुभवामुळे त्यांनी फॅक्टरी मॅनेजर म्हणूनही उत्तम कार्यभार सांभाळला.
परदेशात कुटुंब सोबत होते, आलिशान आणि सुखकर आयुष्य समोर होते. मात्र, त्यांच्या मनात आपल्या देशातल्या तरुणांसाठी काहीतरी करण्याची तळमळ सतत उठत होती. देशातील तरुणांना करिअरच्या योग्य वाटा दाखवणे, त्यांना कौशल्याधारित शिक्षण देणे आणि रोजगाराच्या संधी उपलब्ध करून देणे गरजेचे आहे, ही भावना अधिक तीव्र झाली. अखेर या सामाजिक उद्देशासाठी २०१९ मध्ये त्यांनी परदेशातील गलेलठ्ठ पगाराची नोकरी सोडून भारतात परतण्याचा निर्णय घेतला.
मल्टी जिनीयसच्या माध्यमातून हजारोंना रोजगार
मायदेशी परतल्यावर फिरोज यांनी वेळ न घालवता प्रशिक्षण, रोजगार आणि करिअर मार्गदर्शनाच्या क्षेत्रात प्रत्यक्ष कामाला सुरुवात केली. आज ते मल्टी जिनीयस प्रोफेशनल्स प्रा. लि. (पुणे व लंडन) चे मॅनेजिंग डायरेक्टर तसेच जिनीयस प्रोफेशनल्सचे मुख्य कार्यकारी अधिकारी म्हणून धुरा सांभाळत आहेत.
त्यांच्या गेल्या सात वर्षांच्या प्रयत्नांमुळे तब्बल ९०० हून अधिक तरुणांना हक्काचा रोजगार मिळाला आहे. याशिवाय ३००० हून अधिक युवक आणि नागरिकांना शिक्षण, करिअर, नवीन व्यवसाय आणि रोजगाराच्या विविध संधींवर मोलाचे मार्गदर्शन मिळाले आहे.
भरकटलेल्या तरुणांना शिक्षणाच्या प्रवाहात आणणारे समुपदेशन
फिरोज शेख यांचे काम केवळ रोजगार देण्यापुरते मर्यादित राहिलेले नाही. सामाजिक बांधिलकी जपत त्यांनी गुन्हेगारीकडे वळलेल्या अल्पवयीन मुलांसाठी एक विशेष मोहीम हाती घेतली.
चुकीच्या मार्गावर गेलेल्या या मुलांचे वैयक्तिक समुपदेशन करून त्यांना पुन्हा शिक्षणाच्या आणि कौशल्य विकासाच्या मुख्य प्रवाहात आणण्याचे मोलाचे काम ते करत आहेत. तरुणांना योग्य दिशा देण्यासोबतच, नवीन उद्योजक घडवण्यासाठी व्यवसाय मार्गदर्शन आणि विविध विषयांवर प्रशिक्षण कार्यक्रम घेण्यामध्ये त्यांचा नेहमीच सक्रिय सहभाग असतो.
कार्याची आंतरराष्ट्रीय दखल अन् पोलीस आयुक्तांकडून गौरव
आज पुणे आणि लंडन अशा दोन्ही ठिकाणच्या कार्यालयांद्वारे त्यांच्या या संस्थेचे जाळे पसरले आहे. त्यांच्या या शैक्षणिक, सामाजिक आणि व्यावसायिक योगदानाची दखल राष्ट्रीय आणि आंतरराष्ट्रीय स्तरावर घेण्यात आली आहे. त्यांना आजवर अनेक आंतरराष्ट्रीय आणि राज्यस्तरीय पुरस्कारांनी सन्मानित करण्यात आले आहे.
परदेशातील सुखासीन आयुष्य मागे टाकून देशातील मुलांचे भविष्य उज्ज्वल करणाऱ्या या अवलियाचा, पुणे पोलीस आयुक्त अमितेश कुमार यांच्या हस्ते झालेला नागरी सत्कार हा त्यांच्या समर्पणाची पोचपावती देणारा ठरला आहे.
.jpeg "BRICS मध्ये रशियाच्या आणि चीनच्या अध्याक्षांसोबत पंतप्रधान मोदी")
.jpg "किफायतुल्लाह मलिक")
.jpeg)
