बडगाम 

नॅशनल कॉन्फरन्सच्या नेतृत्वाशी गेल्या काही महिन्यांपासून सुरू असलेल्या मतभेदांनंतर, श्रीनगरचे खासदार सय्यद आगा रुहुल्लाह मेहदी यांनी मंगळवारी पक्षाच्या प्राथमिक सदस्यत्वाचा आणि खासदारकीचा राजीनामा दिला आहे. नॅशनल कॉन्फरन्सच्या नेतृत्वाने कलम ३७० च्या पुनर्स्थापनेसह इतर मुख्य निवडणूक आश्वासनांचा त्याग केल्याचा गंभीर आरोप करत त्यांनी पक्षातून बाहेर पडण्याची घोषणा केली.

कलम ३७० आणि निवडणूक आश्वासनांवरून पक्षावर निशाणा

आपले वडील आगा सय्यद मेहदी यांच्या २६ व्या पुण्यतिथीनिमित्त आयोजित सभेत समर्थकांना संबोधित करताना रुहुल्लाह यांनी नॅशनल कॉन्फरन्सचे अध्यक्ष फारूक अब्दुल्ला आणि मुख्यमंत्री ओमर अब्दुल्ला यांच्यावर तीव्र शब्दांत टीका केली. "कलम ३७० ची पुनर्स्थापना, कैद्यांची सुटका आणि मोफत वीज यांसारखी निवडणुकीच्या वेळी दिलेली आश्वासने निव्वळ खोटी ठरली आहेत. आता या खोट्याचा भाग बनून राहणे मला शक्य नाही," असे ते म्हणाले. या सभेनंतर त्यांनी लोकसभा अध्यक्ष ओम बिर्ला यांच्याकडे खासदारकीचा राजीनामा सुपूर्द केला.

नवीन राजकीय चळवळीचे संकेत

आपल्या राजीनाम्याचे वर्णन 'स्वातंत्र्याचा जाहीरनामा' असे करत रुहुल्लाह यांनी जम्मू-काश्मीरमधील जनतेच्या सन्मानासाठी आणि अधिकारांसाठी नवीन राजकीय चळवळ सुरू करण्याचे संकेत दिले. २०१९ मध्ये कलम ३७० हटवल्यानंतर जनतेच्या हक्कांच्या लढ्याचे नेतृत्व नॅशनल कॉन्फरन्स करेल अशी अपेक्षा होती, मात्र निवडणुकीनंतर पक्षाने आपली भूमिका बदलल्याने हा जनतेचा विश्वासघात ठरल्याची खंत त्यांनी व्यक्त केली.