नवी दिल्ली
लष्कर-ए-तोयबाचा दहशतवादी लतीफ भट मारला गेल्यानंतर संपूर्ण काश्मीर ३५ वर्षांत पहिल्यांदाच स्थानिक दहशतवाद्यांपासून मुक्त झाले आहे, असे केंद्रीय गृहमंत्री अमित शाह यांनी सांगितले. दहशतवादाविरोधातील लढ्यातील हा एक महत्त्वाचा टप्पा ठरला आहे. कुलगाम येथे सुरक्षा दलांनी लतीफ भटला ठार केल्यानंतर गृहमंत्री शाह यांनी ही माहिती दिली.
राष्ट्रीय तपास संस्थेच्या (NIA) दोन दिवसीय दहशतवादविरोधी परिषदेच्या उद्घाटन सत्रात अमित शाह बोलत होते. या परिषदेला विविध राज्ये आणि केंद्रशासित प्रदेशांचे वरिष्ठ पोलीस अधिकारी, दहशतवादविरोधी यंत्रणांचे अधिकारी तसेच कायदा, फॉरेन्सिक आणि तंत्रज्ञान क्षेत्रातील तज्ज्ञ उपस्थित होते. केंद्रीय गृहसचिव गोविंद मोहन आणि गुप्तचर विभागाचे संचालक महेश दीक्षित हे देखील उपस्थित होते.
संपूर्ण दहशतवादी जाळ्यावर समन्वयाने आणि सर्वसमावेशक पद्धतीने प्रहार केल्याशिवाय यश मिळणार नाही, असे अमित शाह यांनी स्पष्ट केले. दहशतवादविरोधी लढ्यासाठी केंद्र आणि राज्यांमध्ये अधिक मजबूत सहकार्यावर आधारित 'इकोसिस्टम' उभारण्याचे आवाहन त्यांनी केले. राज्य पोलीस दल आणि केंद्रीय यंत्रणांमधील समन्वयाच्या त्रुटी दूर करण्यात भारताने प्रगती साधली आहे.
काश्मीर ते कन्याकुमारी आणि द्वारका ते कामाख्यापर्यंत प्रत्येक पोलीस ठाण्याच्या स्तरावर दहशतवादाशी लढण्याची एकसमान रणनीती लागू करणारी यंत्रणा उभारत आहोत. संपूर्ण दहशतवादी नेटवर्कची चौकशी करून त्याची क्षमता नष्ट करणे आवश्यक आहे. त्यामुळे अनेक घटना घडण्यापूर्वीच रोखता येतील.
दहशतवादी नेटवर्कविरोधातील कारवाईत १०० हून अधिक गुन्हे दाखल झाले असून २७१ पेक्षा जास्त अटक कारवाया झाल्या आहेत. २०१९ पासून विशेष मोहिमेअंतर्गत ३६ देशांतून ३०३ पलायनवाद्यांना भारतात परत आणले आहे. दहशतवाद, संघटित गुन्हेगारी आणि अमली पदार्थांच्या गुन्ह्यांचा बिमोड करण्यासाठी हे पाऊल आवश्यक ठरले.
या परिषदेदरम्यान अमित शाह यांनी 'फेल-सेफ इन्व्हेस्टिगेशन' (Fail-Safe Investigation) या एनआयए प्रकाशनाचे प्रकाशन केले. तसेच संस्थेच्या 'पुष्टी' (Pushti) पोर्टलचा शुभारंभ केला. चंदीगडमधील एनआयए कार्यालय संकुलाची पायाभरणी आणि दिल्लीतील मैदनगढी येथे संस्थेच्या निवासी संकुलाचे उद्घाटनही त्यांनी केले.