मोहाली
आशियाई चॅम्पियन्स ट्रॉफी पुरुष हॉकी स्पर्धेच्या अंतिम सामन्यात बचावपटू विजेत्या भारतीय संघाने जपानचा ४-१ अशा फरकाने पराभव केला आहे. या विजयासह भारताने या स्पर्धेतील विजेतेपदाची सलग तिसरी हॅटट्रिक साजरी करत एकंदरीत सहाव्यांदा आशियाई चॅम्पियन्स ट्रॉफीवर आपले नाव कोरले आहे.
ऑलिंपियन बलबीर सिंग स्टेडियमवर खेळल्या गेलेल्या या सामन्यात जपानने अनपेक्षित सुरुवात केली. सामन्याच्या अवघ्या तिसऱ्याच मिनिटाला काझुमासा मत्सुमोतो याने सुरेख मैदानी गोल करत जपानला १-० अशी आघाडी मिळवून दिली होती. या गोलनंतर भारतीय संघाने आक्रमणाची धार वाढवली. २० व्या मिनिटाला जपानला लागोपाठ दोन पेनल्टी कॉर्नर मिळाले, मात्र भारतीय बचावफळीने आणि उपकर्णधार हार्दिक सिंगने मध्यफळीत भक्कम खेळ करत जपानची आघाडी वाढू दिली नाही. हार्दिक सिंगचा हा २०० वा आंतरराष्ट्रीय सामना होता.
पहिल्या दोन सत्रांत ०-१ ने पिछाडीवर पडल्यानंतर मध्यंतरानंतर भारतीय संघ वेगळ्याच आक्रमक अवतारात मैदानात उतरला. ४२ व्या मिनिटाला मिळालेल्या पेनल्टी कॉर्नरवर शिलानंद लाक्रा याने गोल नोंदवून भारताला १-१ अशी बरोबरी साधून दिली. त्यानंतर चौथ्या सत्रात भारतीय खेळाडूंनी सामन्यावर पूर्ण वर्चस्व मिळवले. ४८ व्या मिनिटाला दिलप्रीत सिंगने रिव्हर्स हिटद्वारे सुरेख गोल करत भारताला २-१ अशी आघाडी मिळवून दिली.
या गोलनंतर ५३ व्या मिनिटाला जुगराज सिंगने पेनल्टी कॉर्नरचे गोलमध्ये रूपांतर करत भारताची आघाडी ३-१ अशी भक्कम केली. तर लगेचच ५४ व्या मिनिटाला विवेक सागर प्रसादने वर्तुळाच्या वरच्या भागातून जोरदार फटका मारून चौथा गोल नोंदवला. अंतिम शिट्टी वाजण्यापूर्वी जपानला पेनल्टी कॉर्नर मिळाला, मात्र त्यांचा फटका गोलपोस्टच्या बाहेर गेला. या विजयासह भारतीय संघ संपूर्ण स्पर्धेत अजिंक्य राहिला.
