पाकिस्तानचे माजी पंतप्रधान आणि पाकिस्तान तहरीक-ए-इन्साफ (PTI) पक्षाचे संस्थापक इम्रान खान
पाकिस्तानचे माजी पंतप्रधान आणि पाकिस्तान तहरीक-ए-इन्साफ (PTI) पक्षाचे संस्थापक इम्रान खान यांना सर्वोच्च न्यायालयाच्या आदेशानंतरही खाजगी रुग्णालयात भरती न केल्यामुळे पाकिस्तानात राजकीय वातावरण तापले आहे. सरकारने न्यायालयाच्या आदेशाचे उल्लंघन केल्याचा आरोप करत पीटीआयने सरकारविरोधात तीव्र संताप व्यक्त केला आहे. इम्रान खान यांना तात्काळ वैद्यकीय सुविधा आणि सुटका न मिळाल्यास २६ सप्टेंबरपासून देशभरात तीव्र आंदोलने आणि इस्लामाबादकडे लाँग मार्च काढण्याचा इशारा पक्षाने दिला आहे.
सर्वोच्च न्यायालयाच्या आदेशाचे उल्लंघन झाल्याचा आरोप
पाकिस्तानच्या सर्वोच्च न्यायालयाने १८ ऑगस्ट रोजी ७३ वर्षीय इम्रान खान यांना रावळपिंडीच्या अदियाला जेलमधून इस्लामाबादमधील खाजगी 'शिफा इंटरनॅशनल हॉस्पिटल'मध्ये हलवण्याचे आणि १६ सप्टेंबरपर्यंत तिथेच उपचार देण्याचे आदेश दिले होते. मात्र, गुरुवारी रात्री इम्रान खान यांना शिफा रुग्णालयात नेण्याऐवजी सरकारी 'पाकिस्तान इन्स्टिट्यूट ऑफ मेडिकल सायन्सेस' (PIMS) मध्ये नेण्यात आले. तिथे वैद्यकीय तपासणी केल्यानंतर त्यांना पुन्हा अदियाला जेलमध्ये हलवण्यात आले.
एकांतवासातील छळ आणि ढासळती प्रकृती
इम्रान खान यांची बहीण उझमा खान आणि त्यांच्या वैयक्तिक डॉक्टरांनी पत्रकार परिषदेत सांगितले की, इम्रान खान यांना १० महिन्यांपासून टीव्ही किंवा वाचण्यासाठी कोणतेही साहित्य दिले गेलेले नाही. एकांतवासामुळे आणि मानवी संपर्काअभावी त्यांना तीव्र मानसिक त्रास होत असून त्यांचा रक्तदाब वाढला आहे. इम्रान खान यांनी आपल्या उपचाराची तुलना इजिप्तचे माजी अध्यक्ष मोहम्मद मोर्सी यांच्याशी करत, आपल्यालाही त्याच पद्धतीने छळले जात असल्याचे बहिणीशी बोलताना सांगितले.
पीटीआयचा देशभरात आंदोलनाचा इशारा
खैबर पख्तुनख्वाचे मुख्यमंत्री सोहेल आफ्रिदी यांनी इस्लामाबादमध्ये पत्रकार परिषदेत सांगितले की, सरकार आणि एस्टॅब्लिशमेंट स्वतःला संविधानापेक्षा वर समजत आहेत. न्यायालयाच्या आदेशाचा अवमान केल्याप्रकरणी पीटीआयची कायदेशीर टीम न्यायालयात दाद मागणार आहे. इम्रान खान यांच्या सूचनेनुसार पक्षाचे आंदोलन आता अधिक तीव्र केले जाईल आणि संपूर्ण पाकिस्तानात दौरा करून २६ सप्टेंबर रोजी इस्लामाबादकडे भव्य मार्च काढला जाईल.
.jpeg)
