महिला आंदोलकांवर मारहाणीचे आरोप पूर्णपणे निराधार; दिल्ली पोलिसांचे स्पष्टीकरण

Story by  आवाज़ मराठी | Published by  Mrudgandha Dixit • 1 Months ago
जंतरमंतर आंदोलनातील एक दृश्य
जंतरमंतर आंदोलनातील एक दृश्य

 

नवी दिल्ली 

दिल्लीतील जंतरमंतर आणि परिसरामध्ये सुरू असलेल्या आंदोलनादरम्यान महिला आंदोलकांवर शारीरिक अत्याचार किंवा मारहाण केल्याचे आरोप दिल्ली पोलिसांनी सोमवारी फेटाळून लावले. हे आरोप पूर्णपणे निराधार आणि दिशाभूल करणारे असून, महिला आंदोलकांना महिला कर्मचाऱ्यांमार्फत नियमानुसार व आदराने हाताळल्याचे पोलिसांनी स्पष्ट केले आहे.

काय आहेत पोलिसांचे स्पष्टीकरण?

नवीन दिल्लीचे पोलीस उपायुक्त (DCP) सचिन शर्मा यांनी सोशल मीडियावरील दाव्यांचे खंडन करताना सांगितले की, महिला आंदोलकांना नेहमीच नियमांनुसार आणि योग्य आदराने हाताळले जाते. ताब्यात घेण्यात आलेल्या पुरुष आंदोलकांनाही कायदेशीर प्रक्रियेनुसार विहित मुदतीत सोडण्यात आले आहे. सोशल मीडियावर व्हायरल होत असलेले दावे वास्तविक घटनाक्रमाशी जुळत नाहीत.

मुख्य निवडणूक आयुक्तांच्या राजीनाम्याची मागणी

गेल्या काही दिवसांपासून विद्यार्थी संघटना, राजकीय पक्ष आणि कार्यकर्त्यांकडून जंतरमंतर परिसरात निदर्शने केली जात आहेत. निवडणूक आयोगाच्या कामकाजातील कथित अनियमितता आणि विशेष सखोल पुनरावलोकन (SIR) मोहिमेविरोधात मुख्य निवडणूक आयुक्त ज्ञानेश कुमार यांच्या राजीनाम्याची मागणी आंदोलकांकडून केली जात आहे.

दरम्यान, अखिल भारतीय विद्यार्थी असोसिएशनच्या (AISA) सदस्यांनी राष्ट्रीय अध्यक्षा नेहा बोरा यांना विनाओळखपत्र असलेल्या खाजगी वाहनातून नेल्याचा आरोप केला होता. यावर प्रतिक्रिया देताना पोलीस अधिकाऱ्यांनी सांगितले की, काही आंदोलकांनी ड्युटीवर असलेल्या पोलिसांवर हल्ला केला आणि त्यांना दंशही केला. पोलिसांनी सर्व कारवाया कायद्याच्या चौकटीत राहूनच केल्याचे स्पष्ट केले आहे.