मुंबई
दिवाळीत मुंबईत ३०० हून अधिक आगीच्या घटना घडल्या. ध्वनी आणि वायू प्रदूषणात वाढ झाली. या परिस्थितीला मुंबई उच्च न्यायालयाने चिंताजनक म्हटले आहे. फटाके फोडण्यावरील बंदी अधिक व्यापक करण्याचा विचार न्यायालयाने बोलून दाखवला आहे.
न्यायमूर्ती गिरीश कुलकर्णी आणि न्यायमूर्ती नीला गोखले यांच्या खंडपीठाने गुरुवारी महत्त्वाचे निरीक्षण नोंदवले. नागरिक असंवेदनशील राहिले आणि त्यांच्यात नागरी जाणीव नसेल, तर केवळ परवानगी असलेल्या मैदानांवर सामूहिक फटाके फोडण्याची मुभा देऊ, असे खंडपीठ म्हणाले. "शहराला विषारी हवेतून मुक्त करण्याचा हाच एकमेव मार्ग राहील. आम्ही आधीच प्रदूषणाशी झुंज देत आहोत. वाहने आणि उद्योगांचे प्रदूषणही आहे. शहर अधिक राहण्यायोग्य बनवणे गरजेचे आहे. इतरांचे आरोग्य हा आमचा मुख्य विचार आहे," असे न्यायालयाने स्पष्ट केले.
ऑगस्टपासून खंडपीठाने सार्वजनिक रस्त्यांवर फटाके फोडण्यास मनाई करणारे अनेक आदेश दिले होते. दिवाळीतील आगीच्या घटना पाहता नागरिक आपली भूमिका बदलणार नाहीत असे दिसते, असे न्यायालयाने नमूद केले.
"शहरातील लाखो नागरिकांच्या व्यापक हितासाठी आम्हाला कठोर आदेश द्यावे लागतील. पहाटे ३ वाजेपर्यंत प्रचंड ध्वनी प्रदूषण झाले. ते सुरुवातीलाच थांबवणे आवश्यक आहे. शहरातील सर्व फटाक्यांवर बंदी घालणे हाच एकमेव उपाय आहे," असे खंडपीठाने पुढे सांगितले.
मुंबईत दिवाळीदरम्यान ३०० हून अधिक आगीच्या घटनांची नोंद झाली. जीवित आणि वित्तहानी करणारे उत्सव असू शकत नाहीत, असे न्यायालयाने या माहितीवरून स्पष्ट केले.
"दिवाळीत विषारी घटकांचे प्रमाण सर्वाधिक होते. ज्येष्ठ नागरिकांचे काय होईल? स्थितीत कोणतीही सुधारणा झालेली नाही. इतरांच्या मूलभूत हक्कांचे उल्लंघन होत आहे," असे न्यायालयाने म्हटले. या प्रकरणाची पुढील सुनावणी आणि आदेश ७ डिसेंबर रोजी होतील.