वाशिंग्टन
भारत आणि अमेरिका यांच्यातील बहुप्रतिक्षित व्यापार करार अंतिम टप्प्यात असून यामुळे दोन्ही देशांमधील द्विपक्षीय संबंध एका नव्या पातळीवर जातील, असे अमेरिकेच्या परराष्ट्र विभागाच्या एका वरिष्ठ अधिकाऱ्याने म्हटले आहे. हा करार ९० टक्क्यांहून अधिक पूर्ण झाला असून केवळ काही अंतिम मुद्द्यांवर काम सुरू असल्याचे त्यांनी स्पष्ट केले.
पीटीआयशी बोलताना अधिकाऱ्याने सांगितले की, दशकांपासून व्यापाराच्या बाबतीत जे साध्य करता आले नव्हते, तो टप्पा आता गाठला जात आहे. हा करार दोन्ही देशांच्या संबंधांसाठी अत्यंत रोमांचक असणार असून लवकरच यावर शिक्कामोर्तब होईल.
ऑक्टोबरमध्ये अमेरिकेचे परराष्ट्र मंत्री मार्को रुबिओ यांच्या भारत दौऱ्यामुळे या भागीदारीला आणखी बळकटी मिळेल. तसेच डिसेंबरमध्ये फ्लोरिडा येथे होणाऱ्या G20 शिखर परिषदेसाठी पंतप्रधान नरेंद्र मोदी अमेरिकेच्या दौऱ्यावर येणार असून यादरम्यान काही मोठ्या घोषणा होण्याची शक्यता आहे. क्वाड (Quad) देशांच्या परराष्ट्र मंत्र्यांच्या आगामी बैठकांबाबतही त्यांनी सकारात्मक संकेत दिले आहेत.
भारत-मध्य पूर्व-युरोप आर्थिक कॉरिडोअर (IMEC) हा अमेरिका आणि भारतासाठी अत्यंत महत्त्वाचा प्राधान्याचा विषय असल्याचे अधिकाऱ्याने सांगितले. मध्य पूर्व आशियातील परिस्थिती स्थिर झाल्यानंतर हा प्रकल्प वेगाने पुढे जाईल, असा विश्वास त्यांनी व्यक्त केला.
.jpeg)
