मुंबई

महाराष्ट्रात सुरू असलेल्या सणासुदीच्या काळात वाढत्या ध्वनिप्रदूषणाबाबत मुंबई उच्च न्यायालयाने स्वतःहून (सुओ मोटो) गंभीर दखल घेतली आहे. आम्ही कोणत्याही धर्म किंवा सणाच्या विरोधात नाही, मात्र सण साजरे करताना इतरांना त्रास होणार नाही याची काळजी प्रत्येकाने घेतली पाहिजे, असे महत्त्वाचे निरीक्षण उच्च न्यायालयाने नोंदवले आहे.

न्यायमूर्ती जी. एस. कुलकर्णी आणि न्यायमूर्ती नीला गोखले यांच्या खंडपीठाने सण आणि सार्वजनिक कार्यक्रमांमध्ये डीजे, साऊंड सिस्टीम आणि लाऊडस्पीकरमुळे होणाऱ्या ध्वनिप्रदूषणाबद्दल चिंता व्यक्त केली आहे.

राज्य सरकारकडे मागितला अहवाल

या प्रकरणाची सुनावणी मंगळवारी निश्चित करत उच्च न्यायालयाने राज्याचे महाधिवक्ता (Advocate General) मिलिंद साठे यांना ध्वनिप्रदूषणाचे नियम आणि मूर्ती विसर्जन मिरवणुकांमध्ये त्यांची कशी अंमलबजावणी केली जात आहे, याबद्दल माहिती देण्याचे निर्देश दिले आहेत.

न्यायालयाने विचारले आहे की हे नियम कसे पाळले जात आहेत, ध्वनी मर्यादेबाबत मार्गदर्शक तत्त्वे तयार करण्यात आली आहेत का आणि त्यांची प्रभावीपणे अंमलबजावणी होत आहे का? तसेच कायद्याचे उल्लंघन करणाऱ्यांवर काय कारवाई केली जात आहे, याचा तपशीलही न्यायालयाने मागितला आहे.