काकामिगाहारा (जपान)
आशियाई क्रीडा स्पर्धेतील महिलांच्या हॉकी स्पर्धेत भारताने आपल्या शानदार फॉर्मची अनुभूती देत थायलंडचा २०-१ असा दणदणीत पराभव केला आहे. पूल 'बी' मधील या सामन्यात भारताचा हा सलग तिसरा विजय ठरला आहे. भारताच्या स्टार ड्रॅग-फ्लिकर दीपिका सेहरावत हिने एकाच सामन्यात विक्रमी ९ गोल करत भारताच्या विजयात मोलाचे योगदान दिले.
दीपिकाने (२ऱ्या, ८व्या, ९व्या, २४व्या, ३३व्या, ३६व्या, ३९व्या, ५१व्या आणि ५७व्या मिनिटाला) पेनल्टी कॉर्नरवर एकही संधी न सोडता सलग ९ गोल नोंदवले. तिच्याशिवाय नवनीत कौर हिने ४ गोल, ऋतुजा दादासो पिसाळने हॅटट्रिकसह ३ गोल, तर नेहा गोयल, लालरेम्सियामी, साक्षी राणा आणि कर्णधार सलिमा टेटे यांनीही गोल करत भारताच्या विजयात भर घातली. थायलंडकडून एकमेव सांत्वनपर गोल ५७व्या मिनिटाला सुपान्सा समान्सोने केला.
यापूर्वी भारताने उझबेकिस्तानविरुद्ध १९-० आणि इंडोनेशियाविरुद्ध १७-१ असा विजय मिळवला होता. सामन्याच्या सुरुवातीपासूनच भारतीय खेळाडूंनी थायलंडच्या बचावात्मक फळीवर आक्रमण करत ११-० अशी मोठी आघाडी घेतली होती. मध्यांतरानंतरही भारतीय खेळाडूंनी आपला आक्रमक खेळ सुरूच ठेवत एकतर्फी विजय नोंदवला. पूल 'बी' मध्ये सलग तीन विजयांसह भारतीय संघ गुणतालिकेत अव्वल स्थानी आहे. आता भारताचा पुढील सामना शुक्रवारी यजमान जपानविरुद्ध होणार आहे.
.jpeg)
